Мас жолаушы Нұр-Сұлтаннан шыққан пойызды стоп-кранды басып тоқтатқан
"Нұр-Сұлтан - Нұрлы-Жол - Алматы-2" пойызында мас ер адам стоп-кранды басып пойызды тоқтатты, - деп хабарлайды Көліктегі полиция департаменті баспасөз қызметі.
Алматы, NEGE. Оқиға 5 қыркүйекте Жамбыл облысының Бурылбайтал-Қарасай учаскесінде болған. Салдарынан пойыз жоспардан тыс 4 минут аялдама жасаған.
Көлік полициясы тексеру кезінде заңсыз әрекет жасаған жолаушыны анықтаған. Ол - Түркістан облысының 42 жастағы тұрғыны. Полицейлер ер адам ішімдік ішкенін және мас күйде стоп-кранды жұлып алғанын анықтаған.
"Құқық бұзушыны пойыздан шығарып, ҚР ӘҚБтК-нің 440-бабы 1-бөлігі ("Алкогольдік ішімдіктерді iшу немесе қоғамдық орындарға масаң күйде келу") және ҚР ӘҚБтК-нің 560-бабы 1-бөлігі ("Темiржол көлiгi құралдарын пайдалану қағидаларын бұзу") бойынша әкімшілік хаттама жасады" - деді ҚР ІІМ Көліктегі полиция департаментінің бастығы Оңал Бекиев.
Сондай-ақ, ол жыл басынан бері осындай 27 оқиға тіркелгенін айтты.
Қазақстан Республикасының Әкімшілік құқық бұзушылық туралы кодексінің 560-бабына сәйкес пойызды заңсыз тоқтату жеке тұлғаларға бес АЕК (14 585 теңге) мөлшерінде айыппұл салуды қарастырады.