Марқұм банкир Бақыт Ибрагимнің үйі аукционға қойылды
Марқұм банкир Бақыт Ибрагимнің үйі аукционға қойылды. Тиісті хабарландыру e-qazyna.kz порталында жарияланған.
Алматы, NEGE. Мүлікті мемлекеттік активтер департаменті иеліктен шығарды. Сауда-саттық 2025 жылдың 26 наурызында басталады.
Бақыт Ибрагим 2024 жылы 14 наурызда өз-өзіне қол жұмсап, қайтыс болды. Полиция бұл оқиғаны «Өз-өзіне қол жұмсауға дейін жеткізу» бабы бойынша тергеген, бірақ қарашада қылмыстық істің жабылғаны белгілі болды.
Бақыт Ибрагим Qazaq Banki-нің бұрынғы акционері. Ол 2020 жылы Bank RBK қаражатын жымқырғаны үшін 8 жылға сотталған болатын.
Аукционға қойылған нысан коммуналдық меншікке қабылданып, 2024 жылғы 23 ақпандағы Алматы әкімдігінің қаулысына сәйкес, қаланың коммуналдық инфрақұрылымды дамыту басқармасының балансына берілді. Ол Бостандық ауданындағы Қарғалы ықшамауданында, 2-көше, 48-үй мекенжайында орналасқан. Жалпы ауданы 553,6 шаршы метр, сонымен қатар 0,14 гектар жер учаскесі мен қосымша шаруашылық құрылыстары да бірге сатылады.
Объектінің жалпы құны – 460,6 миллион теңге. Сауда 5 наурызда басталады, кепілдік жарнасы – 69 миллион теңгеден асады. Ғимарат 2011 жылы салынған. Ауласында бассейн орналасқан, ал гаражда бірнеше автокөлік бар.
Алматы мемлекеттік активтер басқармасының мәлімдеуінше, коммуналдық меншік нысандарын жекешелендіруден түскен қаражат жергілікті бюджетке жіберіледі.
