Маңғыстаулық Ұлы Отан соғысының ардагері бейбітшілікті бағалап, болашақ үшін дұрыс таңдау жасауға шақырды
Маңғыстау облысында тұратын Ұлы Отан соғысының ардагері Василий Салазкин тұрғындарға үндеу жасап, бейбіт өмірдің қадірін бағалап, оның қандай үлкен қиындықпен келгенін ұмытпау керектігін еске салды.
Маңғыстау, NEGE. Оның айтуынша, соғыстың ауыр жылдары бүкіл халық үшін үлкен сынақ болды. Алайда жауынгерлердің батылдығы мен жанқиярлығының арқасында елдің еркіндігі мен болашағын қорғап қалу мүмкін болды.
Ардагер бүгінгі күні бейбітшілік, бірлік және тұрақтылықты сақтау аса маңызды екенін атап өтті. Ол қазіргі ұрпақ тарихты ұмытпай, ардагерлердің ерлігін құрметтеп, өз елінің болашағына жауапкершілікпен қарауы керек екенін айтты.
Василий Салазкиннің сөзінше, бейбіт өмір – ең басты құндылық, оны көздің қарашығындай сақтау қажет. Ол адамдарды тыныштықты, келісімді және тәуелсіз мемлекетте өмір сүріп, дамуға берілген мүмкіндікті бағалауға шақырды.
«Мен осы бейбіт күн үшін соғыстым. Бейбіт өмірді бағалап, елімізде тыныштықты сақтауға және балаларымыз бен немерелеріміздің лайықты болашағын қамтамасыз етуге көмектесетін шешімдер қабылдаңыздар», – деді Василий Салазкин.
