Маңғыстауда газ ұңғымасынан шыққан апат зардабы толық жойылды
Төтенше жағдайлар министрлігі Маңғыстау облысындағы газ ұңғымасындағы апат жойылғанын мәлімдеді.
Алматы, NEGE. Ведомствоның мәліметінше, апатты жою үшін оқиға орнына төтенше жағдайлар департаменті күштері мен “Ақберен”, “Оңтүстік мұнай сервис”, Nobilis Corp және Varro Operating Group компанияларының мамандары тартылған.
– Оқиға орнында жедел штаб құрылып, онда апатты жою бойынша жұмыс жоспары жасалды. Ауаны газ аналитикалық аппаратурамен өлшей отырып, ұңғыма сағасының жай-күйі зерттелді, – делінген хабарламада.
Келген қызметкерлер мен мамандар құбыр кеңістігі арқылы ұңғыманы жабу жұмыстарын жүргізді. Крест превенторын бөлшектеп, ағып кетуді болдырмау және тығыздауды қамтамасыз ету үшін ұңғыманың кіреберісіне жаңа қорғаныс элементін орнатты.
Сондай-ақ ұңғымадан 60 метр қашықтықта өрт шыққан жағдайда су жинау үшін траншеяны қазу жұмыстары жүргізілді.
Зардап шеккендер жоқ екені нақтыланды. Апаттың себебі анықталып жатыр.
Еске салайық, 6 маусым күні Маңғыстау облысы Бейнеу ауданындағы “Толқын” кен орнында №57 ұңғымадан құбыр кеңістігі арқылы газ шыққан еді.