Маңғыстау полициясының басшысы өзін тексеруге ұсыныс жасады
Әлеуметтік желілерде Маңғыстау облысы полиция департаментінің бастығы мен оның орынбасарлары ұйымдасқан қылмыстық топ құрды деп айыптайтын мәлімдеме тараған.
Астана, NEGE. Департамент бастығы Сағындық Аяғанов аталған ақпараттың жалған екенін айтып, тексеру жүргізуге өзі ұсыныс жолдағанын мәлімдеді.
Маңғыстау облысы Полиция департаментінің бастығы Аяғанов Сағындық интернетте тараған анонимді хаттағы мәліметтерге қатысты тексеру жүргізу туралы бастаманы өз еркімен көтеріп, Ішкі істер министрлігіне және тиісті уәкілетті органдарға ресми хат жолдады,- делінген департамент хабарламасында.
Сонымен қатар, ол тексеру барысында ашықтық пен объективтілікті қамтамасыз ету мақсатында мәслихат өкілдері мен қоғам белсенділерін де қатыстыруды ұсынды. Департамент уәкілетті органдардың әрі қарайғы шешімдерін күтетінін айтқан.
Айта кетейік, 19 қарашада, әлеуметтік желілер мен WhatsApp мессенджері арқылы өңірдің бас полицейі мен оның орынбасарларын ұйымдасқан қылмыстық топ құрды деп айыптайтын бірлескен мәлімдеме тарала бастады.
Маңғыстау облысы полиция департаментінің басшылары ұйымдасқан қылмыстық топ құрып, бізді орындалмаған жұмыстардың актілерін (Форма-1), шот-фактуралар мен төлем құжаттарына қол қоюға мәжбүрлеуде, сондай-ақ мемлекеттік қаражатты өз бақылауындағы жалған ЖШС-ларға аударып, бюджеттік қаражатты өз бетінше иемденуде, - делінген хабарламада.
Полиция департаменті аталған ақпаратты теріске шығарды.
