Маңғыстау облысында мүгедектігі бар жасөспірімді бір топ бала соққыға жыққан
Маңғыстау облысындағы ауылдардың бірінің тұрғыны кәмелетке толмаған мүгедек баласын бір топ жеткіншек ұрып-соққанын айтты. Полиция оқиғаға қатысты түсінік берді.
Алматы, NEGE. Көшеде досымен бірге келе жатқан Мейрамбек Рақымбердіге кенеттен 10-нан астам бала жабылып, ұрып есінен тандырып кеткен. Салдарынан 14 жасар бала ауруханаға түсті.
Мейрамбектің анасының айтуынша, олар ұлын осымен екінші рет сабап отыр. Сәуір айында да ұрған. Сол кезде жеткіншек 5 күн комада жатып, аман қалыпты. Ол басынан алған ауыр соққыдан эпилепсия ауруына шалдығып, мүгедек болып қалған. Ал сол оқиғадан кейін 9 ай өтсе де, кінәлілер әлі жазаланбаған.
Маңғыстау облыстық полиция департаментінің баспасөз қызметі Ақтауда жеткіншектерді алдымен әкімшілік жазаға тартқанын растады. Облыстық ПД өкілдері кейінірек 14 жастағы жасөспірімді ұрып-соғу ісі әкімшілік істен қылмыстық іске ауыстырылғанын мәлім етті.
14 және 15 жастағы екі мектеп оқушысы қылмысты жасады деген күдікке ілінген.
"Дене жарақатының ауырлығын анықтау үшін сот-медициналық сараптама тағайындалды. Бұл факт Қылмыстық кодекстің 293-бабы (Бұзақылық) бойынша тіркелді. Тергеу мүддесі үшін басқа мәліметтер жария етілмейді", - делінген хабарламада.
