Маңғыстау облысында қызылша жұқтырған балалар саны күрт өскен
Расталған жағдайлардың 84,5 пайызы, яғни 60 жағдай 14 жасқа дейінгі балаларға тиесілі.
Астана, NEGE. 2025 жылдың қорытындысы бойынша өңірде қызылша жұқтыруы мүмкін деген күдікпен 174 жағдай тіркеліп, оның 81-і зертханалық түрде расталған. Ауырғандардың 80 пайыздан астамы – 14 жасқа дейінгі балалар, деп жазады Lada.kz.
Осы жылдың басынан бері өңірде эпидемиологиялық ахуал нашарлады. Қызылша күдігімен 131 жағдай тіркелсе, оның 71-і расталған. Бұл өткен жылдың осы кезеңімен салыстырғанда 1,6 есе көп.
«Расталған жағдайлардың 84,5 пайызы, яғни 60 жағдай 14 жасқа дейінгі балаларға тиесілі. Ауырғандардың 69 пайызы (49 жағдай) – бес жасқа дейінгі балалар. Науқастардың 70,4 пайызы (50 жағдай) вакцина алмаған. Оның ішінде: 66 пайызы (33 жағдай) – екпеден бас тарту себебінен, 10 пайызы (5 жағдай) – медициналық қарсы көрсетілімдерге байланысты екпе алмаған, ал 24 пайызы (12 жағдай) – вакцина жасына әлі жетпеген балалар. Облыстық орташа көрсеткіштен (8,64) жоғары деңгей Ақтау қаласында – 17,39 (екі есе жоғары) және Түпқараған ауданында – 10,64 (1,2 есе жоғары) тіркелді», – дейді өңірлік санитариялық-эпидемиологиялық бақылау департаментінің басшысы Мұхтар Сербаев.
Оның айтуынша, қызылшадан қорғанудың жалғыз жолы – вакцинация.
Облыста 2026 жылғы 5 қаңтардан бастап эпидемиологиялық жағдай тұрақталғанға дейін 6 айдан 10 ай 29 күнге дейінгі балаларға, сондай-ақ 18 жасқа дейінгі балаларға қосымша вакцинация жүргізу басталды.
