Маңғыстау облысында 50 жолаушы мінген автобус аударылып, 4 адам қаза тапты
Жол апаты 16 қаңтарға қараған түні болған.
Астана, NEGE. Шамамен түнгі сағат 01:03-те KZ-11 «Доссор – Құлсары – Бейнеу – Сайөтес – Шетпе – Жетібай – Ақтау» автомобиль жолының 383-шақырымында Yutong маркалы жолаушылар автобусы жол апатына ұшырады, – деп хабарлады Көлік министрлігі.
Алдын ала мәлімет бойынша, Ақтау қаласынан Бейнеу ауылы бағытында келе жатқан автокөлік жүргізушісі көлікті басқара алмай, автобус аударылып кеткен.
«Жол-көлік оқиғасы салдарынан төрт жолаушы қаза тауып, үш адам әртүрлі дәрежедегі жарақат алып, медициналық мекемелерге жеткізілді. Автобуста барлығы 50 адам болған.
Жол-көлік оқиғасы кезінде көлік құралын 1985 жылы туған жүргізуші басқарған. Алдын ала мәлімет бойынша, жүргізуші жол-көлік оқиғасы болған жерден шамамен 200 км бұрын ауысқан», – делінген хабарламада.
Жол-көлік оқиғасы фактісі бойынша Маңғыстау облыстық полиция департаменті мән-жайды анықтауға бағытталған тергеу шараларын жүргізуде.
Министрлік мәліметінше, автобус 2025 жылдың 19 желтоқсанында техникалық тексеруден өткен және «CASPIAN TRANS CORPORATION» LLC компаниясында тіркелген. Ал жол-көлік оқиғасы тіркелген автожол учаскесі техникалық II санатқа жатады, жол жамылғысында ақаулар анықталмаған. Жол белгілері бекітілген дислокацияға сәйкес толық көлемде орнатылған.
