Мамания мектебі қайта қалпына келуі мүмкін
Депутат Бақытжан Жұмағұлов ҚР Парламент Сенатының жалпы отырысында Жетісудағы «Мамания» мектеп-медресесін қалпына келтіру қажеттігі туралы мәселе көтерді.
Алматы, NEGE. Сенатор Бақытжан депутаттық сауалын ҚР Премьер-министрінің орынбасары Ералы Тоғжановтың атына жолдады.
Оның айтуынша, «Мамания» – Жетісу өңіріндегі алғашқы білім беру орталықтарының бірі. Мектеп-медресе 1899 жылы ашылған, бүгінгі таңда оның тек іргетасы ғана қалған. Бақытжан Жұмағұлов осындай құнды тарихи ескерткішті қалпына келтіру өскелең ұрпақтың бойында патриоттық сезімді дамыту үшін маңызды деп санайды.
«Мамания мектеп медресесін қайта қалпына келтіріп, мемориалдық үйге, әрі тарихи этнографиялық музейге айналдырған жөн. Сонымен қатар, жақсының тұяғы болған бүкіл Маман ұрпақтарына, сол жерден білімнің нәрін алып, оқыған ұлтымыздың ұлы тұлғаларына арналған шәкірттер аллеясын жасауды ұсынамын. Бұл ретте, Мамания мектебін қайта қалпына келтіру жастарды патриотизмге, ұлттық руханиятты сүюге ықпал ететін игі іс болады деп ойлаймын», – деді Бақытжан Жұмағұлов.