«Мәдениет саласынан орын табар»: ІІМ орынбасары билеген полицейлерге қатысты пікір білдірді

Астана, NEGE. Игорь Лепеханың айтуынша, тәртіптік комиссия қызметкерлердің әрекетін қызметтік әдеп пен полиция қызметкерлерінің мінез-құлқына қойылатын талаптарды бұзу деп бағалаған.

«Қызметтік міндетін атқарып жүрген, формадағы қызметкерді қандай да бір блогердің немесе басқа адамның көтеріп алуын дұрыс емес деп есептейміз. Мүмкін, біз консервативті адамдар шығармыз. Бірақ полиция қызметкері өзін бұлай ұстамауы керек. Тәртіптік комиссия бұл қызметкерлерді жұмыстан шығарған дұрыс деп шешті. Мүмкін, олар мәдениет саласынан өз орындарын табар», – деді ІІМ басшысының орынбасары Үкімет баспасөз конференциясында.

Лепеха бұл жағдайға қатысты қоғамдық пікірдің екіге бөлінгенін де атап өтті.

Еске салайық, оқиға «Хан Шатыр» сауда орталығының маңында болған. Египеттік тревел-блогер Ахмед Хаггагович бейнеролик түсіру барысында туристік полицияның екі қызметкерін видеоға түсірген. Полицейлер блогермен бірге бірнеше би қимылын орындап, кейіннен блогер олардың бірін көтеріп алып, айналдырған.

Қызметтік тексерістен кейін екі қызметкер де ішкі істер органдарынан босатылды.