ІІМ терроризм туралы жалған хабарлама таратқандар жауапқа тартылатынын ескертті
Ішкі істер министрлігі байланыс құралдары, интернет-ресурстар, мессенджерлер мен әлеуметтік желілер арқылы жарылғыш зат қою немесе өзге де қауіптер туралы жалған ақпарат тарату фактілері тіркеліп жатқанын хабарлады.
Астана, NEGE. Ведомство мәліметінше, мұндай әрекеттер әзіл, қалжың ретінде жасалса да, қылмыстық құқық бұзушылық ретінде бағаланады. Терроризм актісі туралы көрінеу жалған хабарламалар таратқаны үшін Қазақстан Республикасының Қылмыстық кодексінің 273-бабына сәйкес жауапкершілік көзделген.
«Терроризм актісі туралы көрінеу жалған хабарламалар қоғамдық қауіпсіздікке қауіп төндіріп, жаппай эвакуацияларға, мемлекеттік органдардың, білім беру, медициналық және басқа да әлеуметтік нысандардың жұмысын тоқтатуға әкеледі, сондай-ақ шұғыл қызметтердің елеулі күштері мен құралдарын алаңдатады», – делінген ІІМ хабарламасында.
Бұл қылмысты жасағаны үшін Қазақстан заңнамасына сәйкес бас бостандығынан айыруға дейінгі жаза қарастырылған.
Осыған байланысты полиция қызметкерлері:
- тексерілмеген ақпаратты таратпауға;
- жалған шақырулар мен хабарламалар жасамауға;
- балаларға терроризм актісі туралы жалған хабарламалар үшін жауапкершілік бар екенін түсіндіруге;
- қауіп-қатері бар хабарламалар алған жағдайда дереу полицияға хабарлауға кеңес береді.