Ломбардтағы қарыздар соттан тыс банкроттық шартынан алынып тасталды
19 наурыздан бастап ломбардтар алдындағы міндеттемелер соттан тыс банкроттық рәсімі шеңберінде қарастырылмайды.
Астана, NEGE. Бұл жөнінде Мемлекеттік кірістер комитеті хабарлады.
Комитет өкілдерінің түсіндіруінше, «ҚР азаматтарының төлем қабілеттілігін қалпына келтіру және банкроттығы туралы» заң ережелеріне сәйкес, соттан тыс банкроттық рәсімін қолдану үшін банктер, коллекторлық агенттіктер және микроқаржы ұйымдары алдындағы берешегін 12 ай бойы төлемеген болуы керек.
Микроқаржы ұйымдарының бір түрі ретінде саналатын ломбардтардың қызмет ерекшелігі – қарыздардың толықтай кепілмен қамтамасыз етілуінде. Яғни, қарыз алушы өз міндеттемелерін орындамаған жағдайда, ломбардтар оның кепіл мүлкін өз бетінше сатады. Осыған байланысты ломбардтар алдындағы міндеттемелер бойынша төлемнің болмау мерзімі 12 айдан аспайды.
«Енгізілген түзетулер ломбардтар алдындағы міндеттемелер бойынша төлемнің болмау мерзімін есепке алмауға мүмкіндік береді», – дейді Кірістер комитеті өкілдері.
Осылайша ел азаматтарына соттан тыс банкроттық рәсімін қолдану арқылы өз қаржылық мәселесін шешуіне жағдай жасалмақ.