ЛХР мен ДХР-дегі референдумды біз НЕГЕ мойындамаймыз?
«Луганскі халықтық республикасының (ЛХР) Ресей федерациясының құрамына қосылуына қатысты референдум өтті деп мойындалды. Оған сайлаушылардың 50 пайызынан астамы қатысты», – деп хабарлады ЛХР орталық сайлау комиссиясының басшысы Елена Кравченко.
«Луганскі халықтық республикасының барлық аумағында сайлаушылар белсенді болды. Дауыс берудің үшінші күні референдумға қатысушылардың 50 пайыздан астамы келді. Осылайша, референдум өтті деп есептеледі», – депті Е.Кравченко.
ЛХР мен ДХР-ді Ресейдің құрамына өтті деп Қазақстан мойындай ма? Бұл туралы президент Қ.Тоқаев Санкт-Петербургтегі форумда М.Симонянның арандату сұрағына берген жауабында айтып қойған.
«Түрлі пікір айтылып жүр. Біреулер мемлекеттің біртұтастығы – қасиетті ұғым дейді, енді біреулер белгілі бір мемлекеттің құрамына кіретін халықтың өз жеке мемлекеттігіне және бөлінуге құқылы деседі. Жалпы, егер халықтардың осындай құқығы жаппай іске асатын болса, қазір БҰҰ-ның құрамында 193 мемлекет емес, 500 немесе 600 мемлекет болар еді. Әрине, бұл дегеніңіз – хаос. Осы себепті біз Тайваньды да, Косовоны да, Оңтүстік Осетия мен Абхазияны да мойындамаймыз. Дәл осындай принцип Донецкі мен Луганскі сияқты квазимемлекеттік құрылымдарға да қолданылатын болады».
Яғни ЛХР мен ДХР-де өткен «референдумға» қатысты Қазақстанның ұстанымы айқын деген сөз. Әрине, орта жолдан көлденең кедергілер килігіп кетпесе...
