Іле-Балқаш резерватында жолбарыстар жерсіне бастады
«Іле-Балқаш» мемлекеттік табиғи резерваты жолбарыстардың жаңа мекенге бейімделу сәттерін көрсетті.
Алматы, NEGE. Арнайы түсірілген бейнежазба 29 шілдеде, Халықаралық жолбарыс күні жарияланды.
Мамандардың айтуынша, тұран жолбарысы ғасырлар бойы қазақ даласының нағыз иесі болған. Оны Қазақстан аумағына қайтара жерсіндіру – елдегі ең ірі экологиялық жобалардың бірі саналады.
Бұған қоса, табиғатты қорғау саласындағы оң жаңалықтар жалғасуда. Бұған дейін «Алтын-Емел» ұлттық паркінде Қызыл кітапқа енген сирек дала қырандарының балапан өргізгені анықталған. Көрікті құстардың ұясы Бассин орман шаруашылығы аумағынан табылды.