Құрманбектің қонжықтары дүниеге келді
Зообағымыздағы Тянь-Шань ақ тырнақты аюлары – Герда мен Құрманбектің жұбында екі жаңа төл өмірге келді, деп хабарлады Алматы зообағының баспасөз қызметі.
Алматы, NEGE. Зообақтың мәліметінше, олар өткен жылы 19 желтоқсанында жарық дүние есігін ашқан. Қазір қонжықтардың жағдайы жақсы.
«Кішкентай аюлардың анасы – Герданың да денсаулығы жақсы. Ол осымен үшінші рет өмірге ұрпақ әкеліп отыр.
Герда бұған дейін 2017 және 2021 жылы төлдеп, баршамызды қуантқан болатын. Ол кезде оларға біздің парақшамызға жазылған өздеріңіз ат қойған болатынсыздар», – деп бөлісті зообақ қызметкерлері.
Жаңа туған қонжықтар әзірге анасының қасында.
«Қонжықтардың жыныстарын анықтағаннан кейін біз оларға ат қоюға байқау жариялайтын боламыз. Қонжықтар жарты жылға дейін анасының сүтімен қоректенеді. Қазір Гердаға лайықты мөлшерде азық берілуде. Оның сүйікті қорегінің ішінде – жеміс-жидек, ет, балық, ботқа, нан, жарма, түрлі витаминдер бар. Қазіргі уақытта Герда қонжықтарымен бірге өзінің апан-үйшігінде. Ол кішкентай аюларды қызметкерлерге де көрсеткісі келмей, бауырына басуда», – делінген хабарламада.
Күн жылына бастағанда және қонжықтар кішкене өсіп-жетілгенде Герда оларды даладағы қоршауға шығаратын болады.
