Құрылтай сайлауы тамызда өтеді
Бұл жөнінде Мемлекет басшысы Қасым-Жомарт Тоқаев мәлімдеді.
Астана, NEGE. Президент ғалымдарды марапаттау рәсімінде сөйлеген сөзінде Конституция күшіне енген сәттен бастап бір палаталы Құрылтай сайлауын өткізу жөніндегі Жарлыққа қол қоятынын айтты.
«Сайлау биыл тамыз айында өтеді. Мұны әдейі ерте айтып отырмын. Өйткені партиялардың жоспарларын айқындап, сайлау науқанына дайындық жүргізуіне жеткілікті уақыты болуы керек. Осылайша, партиялардың сайлаушылармен тиісті жұмыс жүргізуіне бес айға жуық уақыт беріледі», – деді Тоқаев.
Мемлекет басшысының айтуынша, Құрылтай сайлауы Қазақстанның бүкіл саяси жүйесін жаппай «қайта құруға» жол ашады. Сондай-ақ, президенттің пікірінше, қазіргі саяси және экономикалық реформалар қоғамдық сананың оң сипатта өзгеруіне әсер етеді.
