«Күндіз – Түркістан, түнде – Ауғанстан». Мас «депутат» мейрамханада шу шығарды
Түркістан облысындағы мейрамханалардың бірінде ер адам шу шығарып, жұртты балағаттаған. Бұл туралы «За нами выехали» телеграм-каналы хабарлады.
Алматы, NEGE. Видеодан байқағанымыздай, өзін «облыстық мәслихаттың VII шақырылымының депутатымын» деген ер адам мейрамханалардың бірінде қызметкерлерге жұдырық ала жүгіріп, жұрттың бәрін балағаттап жүр.
Мейрамхана қызметкерлерінің бірі «депутаттың» дөрекі әрекеттерін телефонына түсіріп жүргені байқалады.
Облыстық полицияның хабарлауынша, оқиға 17 қазан күні түнгі сағат бір шамасында болған. Тәртіп сақшылары ер адамның ішкен-жегеніне төлем жасағысы келмей, жанжал шығарғанын айтты. Оның үстінен әкімшілік хаттама толтырылып, материалдар сотқа жөнелтілді.
Видеоны көрген желі қолданушылардың бірі: «Күндіз – Түркістан, түнде – Ауғанстан» деп жазба қалдырыпты.
