Құлсарыдан келген 600-ге жуық адамды Мақат ауданының еріктілері күтіп алып, тегін жеткізіп жатыр
Атырау мен Доссордан келген таксистер құлсарылықтарды тегін жеткізіп жатыр.
Алматы, NEGE. 2024 жылдың 4 сәуірінен бастап Атырау облысы, Жылыой ауданына қарасты Құлсары қаласы су тасқыны салдарынан қиын жағдайға тап болды.
5 сәуір сағат 17:00-дегі жағдай бойынша су тасқыны салдарынан 500-ге жуық нысан мен инфрақұрылымдық ғимараттар су астында қалды. Сондай-ақ, әлеуметтік нысандар, орталық стадион, Құлсары әкімдігі және сауда нүктелерін су басты.
Естеріңізге сала кетейік, су тасқынына байланысты Құлсары-Доссор учаскесінде көлік қозғалысы толығымен тоқтатылды, соған орай ұлттық тасымалдаушы өңір тұрғындарын эвакуациялау үшін жолаушылар пойызын жіберу туралы шешім қабылдады.
Халықты тасымалдауды қамтамасыз ету үшін «Жолаушылар тасымалы» АҚ-на Құлсары станциясынан Атырауға жолаушылар пойызы бекітілді.
Құлсарыдан келген 590-дай адамды Мақат ауданының еріктілері теміржолдан күтіп алып, Атырау, Доссор елді мекендеріне тегін жеткізіп жатыр.
