Құлсарыда жанармай бекетінде жарылыс болды: 2 адам қаза тапты
Атырау облысының Құлсары қаласында 30 мамырда сағат 18:45 шамасында газ-ауа қоспасы жарылды.
Алматы, NEGE. Атырау облыстық төтенше жағдайлар департаментінің мәліметінше, жарылыс Құлсары қаласындағы Махамбет көшесінде болған.
Жарылыстан 14 адам зардап шекті. Оның 2-еуі қайтыс болды.
Олардың барлығы Жылыой аудандық ауруханасына жеткізілді, деп хабарлады Атырау облысының денсаулық сақтау басқармасы.
«Төрт адам амбулаториялық бақылауда. Қазіргі жағдайда ауыр реанимациялық науқас жоқ.
Ауруханаға жатқызылған 7 науқастың жағдайы — орташа ауыр, 3 пациенттікі — тұрақты.
Зардап шеккендер тиісті медициналық көмекті толықтай қамтылды. Аймақ басшысының тапсырмасы бойынша Жылыой аудандық орталық ауруханасына Атыраудан мамандар мен медицина қызметкерлері қосымша көмекке жіберілді, олардың қатарында күйік орталығының дәрігерлері де бар», – делінген хабарламада.
Жарылыстың салдарынан жақын орналасқан бір қабатты құрылыс, газ құю стансасы мен 2 қабатты ғимарат өртенген.
Жанармай бекетінде болған жарылысқа байланысты қылмыстық іс қозғалып, тергеу басталды
