Күдебаев қайда қарап жүр?
Кейбір көлік жүргізушілері «қымбат көлік мінсем жол ережесі болмайды» деп түсінетін сыңайлы. Желіде кешелі бері тарап жатқан төмендегі видео соны аңғартады.
Алматы, NEGE. Журналист Михаил Козачков кеше түнде телеграмм каналына видеоны жүктеп «Бұл жолы қай генералдың немересі, білмейсіздер ме?» деп жазды. Ал бүгін, видеодан байқалған бір көліктің иесін анықтап, оның суретін де жария етті.
Көлік Алматы облысында тіркелген. Мемлекеттік нөмірі анық көрініп тұр. Осыдан болса керек, Козачков «Кешегі видеодағы «Майбах» иесі осы. Көлікті жалға беретінге ұқсайды. Күдебаевқа өзі бақылайтын аймақта заңға бағынбайтындар кім екені қызық болса, осы жігіттен сұрап алуға болады» деп толықтырды.
