Қуандық Бишімбаев сотқа шағым түсірді
Азаматтық некедегі әйелі Салтанат Нүкенованы өлтіргені үшін сотталған бұрынғы министр Қуандық Бишімбаев түзеу мекемесі әкімшілігінің үстінен сотқа шағымданды, деп хабарлады Қылмыстық атқару жүйесі комитетінің (ҚАЖК) баспасөз қызметі.
Алматы, NEGE. Қуандық Бишімбаев мекеме әкімшілігі тарапынан ешқандай көтермелеу шаралары жасалмай жатқанын айтып, арызданған.
Сонымен бірге, қолданыстағы заңнамаға сәйкес сотталғандарға жазаны өтеу тәртібі бұзылған жағдайда көтермелеу шаралары берілмейді.
«Қолданыстағы заңнамаға сәйкес сотталғандарға жазаны өтеу тәртібі бұзылған жағдайда көтермелеу шарасы қолданылмайды. Сотталушының бір рет тәртіп бұзғанын ескере отырып, оған көтермелеу шаралары қолданылған жоқ», - делінген хабарламада.
Сот Қуандық Бишімбаевтың талап арызын қанағаттандырмады.
Еске сала кетейік, 2023 жылы 9 қарашада Астанадағы Bau мейрамханасында экс-министр Қуандық Бишімбаев азаматтық некедегі әйелі Салтанат Нүкенованы өлтірді деген айыппен ұсталған болатын.
Сот үкімімен Бишімбаев 24 жылға бас бостандығынан айырылды. Оның туысы Байжанов аса қауіпті қылмысты жасырғаны үшін кінәлі деп танылып, 4 жылға сотталды.