ҚТЖ: 4,2 млрд доллар тек 300 локомотивтің құны емес
Нью-Йоркте Қазақстан темір жолы мен америкалық Wabtec компаниясы 4,2 млрд долларлық келісімдерге қол қойды. Жоспарға сай, елімізде 300 жаңа жүк локомотиві құрастырылып, оларға кейін сервистік қызмет көрсетілмек.
Астана, NEGE. «ҚТЖ-Жүк тасымалы» ЖШС Бас директорының орынбасары Шолпан Омарбекованың айтуынша, 4,2 млрд доллар тек локомотивтердің құны емес, бірнеше келісімшарттың жалпы сомасы. Оған мыналар кіреді:
1. 2027 жылдан 2036 жылға дейін жыл сайын 30-дан, барлығы 300 локомотив сатып алу;
2. бұрын алынған 405 локомотивке сервистік қызмет көрсетуді 2058 жылға дейін жалғастыру;
3. жаңа локомотивтерге 2054 жылға дейін толық сервистік қызмет көрсету;
4. пойыздарды бақылау және диагностика жасауға арналған Кinetix жүйесінің бес кешенін алу;
5. үш жыл ішінде 505 локомотивтің тежегіштері мен компрессорларын жөндеу;
6. шалғайдағы сервистік орталықтарда жұмыс істейтін мамандарға арнап әлеуметтік нысандар салу.
Жоба компанияның өз қаражаты мен несие есебінен қаржыландырылады. Ал техникалық қызметке кететін шығындар толықтай ҚТЖ-ның табысынан жабылады.
«Бұл келісім бізді міндетті түрде Америкадан қарыз алуға міндеттемейді. Қаржыны еуропалық институттардан немесе қазақстандық банктерден де тартуға болады. Бастысы – шарттары тиімді болуы керек: несие кемінде 10 жылға берілсе, пайызы қолжетімді болса, жеңілдік уақыты қарастырылса және бізден локомотивтерді кепілге қоюды талап етпесе», – деді Омарбекова.
Жаңа локомотивтер Астанадағы зауытта америкалық технология бойынша жасалып, жүк тасымалына қолданылады.
