Крещение мерекесінде мұсылмандарға суға түсуге бола ма?
Қазақстан мұсылмандары діни басқармасының (ҚМДБ) мамандары мұсылмандардың өзге діндердегі діни рәсімдерге қатысуына қатысты пікір білдірді.
Алматы, NEGE. Православ христиандарының Крещение мерекесіне мұсылмандардың қатысуын шариғат құптамайды, бұл исламның қағидаларына қайшы. Сонымен қатар мұндай әрекет «күнә» болып есептеледі.
«Ислам дінінде біздерге Алланың елшісі Мұхамед (с.ғ.а.) бекітіп берген белгілі бір мереке күндеріміз бар. Өзге дін өкілдерінің де мерекесіне ешқандай қарсылық пен кедергі жасауымызға болмайды. Бірақ олармен бірге тойлауға рұқсат етілмейді. Өйткені пайғамбарымыз: «Кім қай қауымға ұқсаса, ол сол қауымнан», - деген. Мұсылмандар арасында қандай да бір адам сол күні суға шомылуды қасиет санаса, ол күнәлі әрекет болып саналады», – деді ҚМДБ Жетісу облысы бойынша шәриғат және пәтуа бөліміне жауапты маман Қамит Табарак.
Естеріңізге сала кетейік, 19 қаңтар – православ христиандарының «Крещение Господне» мейрамы. Православ дінін ұстанушылардың сөзінше, осы күні жер бетіндегі барлық су атауы жаңарып, тазарады екен.