Қостанайда масаң күйдегі бірнеше адам полиция қызметкерін тепкіге жықты

Астана, NEGE. «Наша газета» басылымының Telegram-дағы арнасы жариялаған видеодан бірнеше ер адамның полиция қызметкерін жабылып тепкілеп жатқанын көруге болады.

Қостанай облыстық полиция департаменті шабуыл жасау фактісін растады.

Ведомство өкілдерінің хабарлауынша, полиция қызметкері қызметтен тыс уақытта кәмелетке толмаған балаларын ертіп бара жатып, қоғамдық тәртіпті өрескел бұзған адамдарға ескерту жасаған. Әлгі адамдар оған ашық агрессия танытып, физикалық күш қолданған.

«Қызметкер қызметтік формасымен жұмысқа шығып бара жатқан.

Шабуыл жасағандардың барлығы анықталып, ұсталды. Билік өкіліне шабуыл жасау фактісі бойынша қылмыстық іс қозғалды», – деп хабарлады облыстық полиция департаменті,

Күдіктілер үйқамаққа жіберілді. Ал зардап шеккен полиция қызметкері қазір амбулаториялық ем қабылдап жатыр, оқиға кезінде балалары зардап шекпеген.

Тәртіп сақшылары полиция қызметкеріне қол сұғу заңды тікелей бұзу екенін еске салып өтті. 

«Мұндай әрекеттер қатаң әрі ымырасыз түрде тоқтатылады. Әрбір кінәлі толық көлемде жауапкершілікке тартылады», – деп ескертті полиция өкілдері.

Еске салсақ, бұған дейін Алматыда ер адам науқасқа шақырту бойынша барған медицина қызметкерлерін пышақпен қуалап, қорқытқаны үшін қамауға алынғанын жазған едік.