Қостанайда дәрігерге шабуыл жасаған күдікті екі айға қамауға алынды
Қостанай облысында дәрігерді соққыға жыққан ер адам қамауға алынды. Бұл туралы облыстық прокуратура ресми мәлімдеме таратты.
АЛМАТЫ, NEGE. Ресми ақпаратқа сәйкес, күдікті ҚР Қылмыстық-процестік кодексінің 128-бабына сәйкес ұсталып, сот шешімімен екі айға қамауға алынды. Оны полиция қызметкерлері жедел ұстаған.
Еске сала кетейік, бұған дейін Қостанай облыстық ауруханасының жедел жәрдем қабылдау бөлімінде белгісіз ер адам жас хирургке шабуыл жасағаны хабарланған болатын. Зардап шеккен ақ халатты маман дереу Астана қаласындағы ауруханаға жеткізілді.
Оқиға қоғамда үлкен резонанс туғызды. Осыған байланысты Денсаулық сақтау министрі Ақмарал Әлназарова Қостанай мен Қарағанды қалаларында медицина қызметкерлеріне қарсы жасалған оқиғалардан кейін халыққа үндеу жолдады. Министрдің айтуынша, денсаулық сақтау нысандарында қауіпсіздікті күшейту мақсатында Ішкі істер министрлігімен бірлесіп, шұғыл түрде ургенттік стационарлардың, балалар және перинаталдық орталықтардың қабылдау бөлімдерінде тәулік бойы күзет посттарын орнату туралы шешім қабылданды.
