Қостанай облысында су тасқыны салдарынан жол жабылды
Қостанай облысы Қарасу ауданында көктемгі су тасқынынан кейін Алабота және Қойбағар көлдеріндегі су деңгейінің көтерілуі "Қарасу-Үлкен Чураковка" тас жолының (0-15 км) жабылуына себеп болды. Бұл туралы облыстың төтенше жағдайлар департаменті мәлімдеді.
Алматы, NEGE. Департамент мәліметінше, көл сулары нормадан асып, жолдың кейбір учаскелеріне жайылған. Осыған байланысты көлік қозғалысы уақытша тоқтатылып, Новоселовка ауылы мен Әулиекөл ауданы арқылы балама бағыттар ұсынылды.
Баспасөз қызметінің хабарлауынша, қазіргі уақытта жағдай тұрақталған, елді мекендерге ешқандай қауіп жоқ. Төтенше жағдайлар қызметі жағдайды толық бақылауда ұстап отыр.
Сәуір айында Қостанай облысында "Қарабұтақ – Комсомольское – Денисовка – Рудный – Қостанай" тасжолының -22 учаскесіндегі жолдарда су тасқыны болғанын еске саламыз. Бұған Тобыл өзенінің тасуы және Ресей Федерациясынан судың көп келуі себеп болған. Көп ұзамай Есіл өзенінің су деңгейі көтеріліп, Ақмола облысында жолды су шайып кеткен болатын.
Ол кезде Көкшетау – Атбасар автомобиль жолының 120-184 километрінің, яғни Максимовка ауылынан Атбасар қаласына учаскесінің жүру бөлігін су алуына байланысты көліктің барлық түрінің қозғалысына шектеу қойылды.
