Қостанай облысында дизель отынын ұрлағандар анықталды
Қостанай облысында полицейлер Рудный қаласындағы өндірістік бағыттардың бірінде ұйымдастырылған дизель отынын жүйелі түрде ұрлау схемасын әшкереледі, деп хабарлайды Polisia.kz.
Алматы, NEGE. Жедел іс-шараларды ұйымдасқан қылмысқа қарсы күрес басқармасының қызметкерлері жүргізді. Тергеу іс-қимылдары барысында жергілікті тұрғынның үйінен әртүрлі көлемдегі канистралар мен ыдыстарға құйылған едәуір мөлшердегі дизель отыны табылып, тәркіленді. Сонымен қатар отынды құюға арналған жабдық пен сақтау және әрі қарай сату үшін пайдаланылған басқа да жабдықтар тәркіленді.
Тергеу барысында өндірістік нысандарға арнайы техникамен қызмет көрсететін жұмысшы маршруттарды аяқтаған соң жүйелі түрде дизель отынының қалдықтарын төгіп отырғаны анықталды. Кейін бұл жанармай бөгде адамдарға беріліп, сатылған.
Аталған факті бойынша сотқа дейінгі тергеп-тексерулердің бірыңғай тізіліміне тіркеліп, ұрлық бабы бойынша қылмыстық іс қозғалды. Құқық бұзушылық схемасына қатысы бар барлық тұлғаларды анықтауға бағытталған тергеу амалдары жүргізілуде.