Қосшыда ер адам тойда билеп тұрған бишіні жұлқылап, есіктен шығарып жіберген
Биші Threads желісінде басынан өткен жайсыз жағдайдың видеосын жариялады.
Астана, NEGE. Бұл жайт Астана маңындағы Қосшы қаласындағы тойханалардың бірінде болған. Бейнежазбадан бір ер адамның той үстінде шығыс биін билеп тұрған бишіні жұлқылап, той залынан шығарып жібергенін көруге болады.
Биші би билеп жүрген 14 жылда мұндай жағдайға алғаш рет тап болып отырғанын жазады.
«Сенесіз бе? 14 жыл ішінде алғаш рет осындай сұмдық жағдай болды, енді сахнаға шығудан қорқып қалдым. Айтпақшы, назар салыңыз, бұл бөтен мас адам! Ол менің биімді озбырлықпен тоқтатты, оған қоса қастық жасады. Екі күн өтіп кетсе де, арыз жазғым келеді. Мұны жайына қалдыруға болмайды! Оқиға орнында болған тапсырыс берушілер мен асаба да әлгі маскүнемнің атын жасырып қалды», – дейді ол.
Бұған қоса биші жалғызбасты ана екенін, үш баласын бимен асырап отырғанын атап өткен.
Ақмола облысының полициясы бұл фактіні растады: арыз Қосшы қаласының полиция бөлімінде тіркелген. Полицейлердің мәлімдеуінше, қазір оқиғаның мән-жайы анықталып жатыр, ер адамның әрекетіне құқықтық баға берілетін болады.
