Қосымша құн салығы бойынша тіркеу сомасы мен шегі анықталды
2025 жылдың 20 ақпанында Үкімет Мәжілістің қарауына Мемлекет басшысының тапсырмаларын орындауға және салық жүйесін реформалауға байланысты жаңа ұсыныстар енгізді.
Алматы, NEGE. Онда қосылған құн салығы бойынша міндетті тіркеу есебіне қою үшін шекті 20000 АЕК-тен (78,6 млн теңге) 3800 АЕК-ке (15 млн теңге) дейін төмендету, жекелеген салалар үшін ҚҚС мөлшерлемесін 12 пайыздан 16 пайызға дейін арттыру туралы ұсыныс болды. Дегенмен, жоба бойынша жұмыс барысында депутаттар қосылған құн салығы бойынша тіркеу шегін кем дегенде екі есеге арттыруды ұсынды.
Нәтижесінде Үкімет депутаттардың ұсынысын қабылдап, жаңа Салық кодексінің жобасында ҚҚС шегі 40 млн теңге деп белгіленді.
Мәжіліс депутаттары жұмыс тобы отырыстарында 800-ден астам түзету енгізді, оның ішінде:
– екінші деңгейлі банктер мен ойын бизнесі үшін корпоративті табыс салығы мөлшерлемесін 25 пайызға арттыру;
– әлеуметтік саладағы (білім, медицина, ғылым, спорт, мәдениет, кітапханалар) бизнес субъектілері үшін корпоративті салық және қосылған құн салығы бойынша қолданыстағы жеңілдіктерді сақтау және басқалар.
