Косарев: Қазақстанда кез келген кәсіпорынның «крышасы» бар
Мәжіліс депутаты Владислав Косарев Қазақстандағы кәсіпорындардың бүгінгі ахуалы туралы өз ойын айтты.
Алматы, NEGE. Мәжілісте тұтынушылар құқығын қорғау мәселелері бойынша түзетулерді талқылау кезінде депутат Косарев Сауда және интеграция вице-министрі Қайрат Төребаевтан жетістіктерге босқа қуана бермеуді сұрады.
«Біздің еліміздің әрбір бұрышы бақылауға алынған және әрбір кәсіпорынның өз «крышасы» бар. Мен жақында ауылда болдым. Ірі шаруашылықтың иесі маған: «Міне, депутат, мен бүгін 470-500 келі салмақтағы 400 бұқаны союға дайынмын. Мен оны ет комбинатына өткізе алмаймын, өйткені ет комбинаты тікелей менен қабылдамайды. Оны алдымен ет комбинаты директорының інісі сатып алады, сосын алып кетеді», - деді. Бұл не деген бассыздық? Елімізде көзге көрініп тұрған ірі мәселелер жетерлік, ал сіздер оны мүлдем байқамайсыздар. Сіздер мемелекеттік орган емессіздер ме? Халықтың алдындағы жауапкершіліктеріңіз, қоғамдық ұйымға қарағанда жоғары», - деді мәжіліс депутаты.
Депутат бұл мәселенің әлі де шешімін таппағанына қапалы.
Вице-министр Қайрат Төребаев Владислав Косаревті тұтынушылар құқығын қорғау туралы заң жобасы бойынша жұмыс тобының аясында аталған мәселені бірлесіп пысықтауға шақырды.
