Коронавирус: Ресейде өлім дерегі бойынша антирекорд тіркелді

Алматы, NEGE. Өткен 24 сағат ішінде COVID-19 салдарынан 780 адам көз жұмды, - деп хабарлайды Ресей коронавирус инфекциясының тарауына қарсы күрес штабы. Бұған дейін тәуліктегі антирекорд 10 шілдеде тіркелген - 752 өлім жағдайы. Өткен тәулікте 780 адам қайтыс болғаны айтылып отыр. Ауру пайда болғалы Ресейде 144 492 адам қаза тапқан. Атап айтқанда, Санкт-Петербургте 108 адам, Мәскеуде – 103, Иркутск облысында – 32 адам қайтыс болды.

«Дельта» штамына байланысты Ресей Денсаулық сақтау министрлігі коронавирус инфекциясын жұқтырғандарды емдеуге арналған нұсқаулықтардың жаңа нұсқасын дайындап жатқаны айтылады. Дегенмен Мемлекеттік Думаның депутаты және Ресейдің бұрынғы бас санитария дәрігері Геннадий Онищенконың айтуынша, инфекциядан ең маңызды қорғаныс – коронавирусқа қарсы вакциналау. Ол барлық ресейлікті COVID-19 инфекциясына қарсы екпе салдыруға шақырды.