Көрерменге көп ой салған – «Пилигрим»
Алматыда «Пилигрим» қойылымының тұсауы кесілді.
Алматы, NEGE. Эксперименталды пластикалық қойылым көрермен мен сахна арасындағы көрінбес қабырғаны бұзды. Олай дейтініміз актерлық құрам академияны оқып, кәсіби маман болмаған. Былайша айтқанда қарапайым қала тұрғындары. Ұйымдастырушылардың айтуынша, аталған қойылым актерлары бір тоқсан бойы дайындалған.
Қойылым негізі музыка мен биге құралған. Сахнада қозғалыс көп. 60 минутқа созылған «Пилигрим» ешнәрсені нақтыламайды. Негізгі идеяны сөзбен жеткізе салмайды. Бірақ, адам өмір жолында қилы қиындыққа, сан сынаққа кезігетінін көрсетеді. Одан шығудың басты жолы сабырлық сақтау немесе мән бермеу деп бағыт көрсетпейді. Картинаны көріп отырған көрермен өз жадын жаңғыртып, жаңаша ой түйеді. Бұл замануи театр өнерінің тағы бір шыңының көрінісі. Олай дейтініміз көрермен қойылымды бір деммен көріп, ерекше ықылас көрсетті.
Труппа 18 адамнан тұрады. Олардың қатарында көпбалалы ана, танымал суретші, банк менеджері секілді түрлі мамандық иелері бар екен.
Спектакльдің қоюшы-режиссері – Франк Валдес. Ол Куба астанасындағы Өнер Академиясының түлегі әрі танымал биші.
