Қонаев қаласында жергілікті ауқымдағы төтенше жағдай жарияланды

Астана, NEGE. Қалалық әкімдік өкілдерінің мәлімдеуінше, Қонаевта 11 желтоқсаннан 12 желтоқсанға қараған түні қатты желдің салдарынан бірқатар тұрғын үйлер мен ғимараттардың шатырлары зақымданып, көшедегі жарық бағаналары істен шыққан.

«Қазақстан Республикасының қолданыстағы заңнамасына сәйкес, Қонаев қаласының әкімі табиғи сипаттағы жергілікті ауқымдағы төтенше жағдай жариялау туралы шешім қабылдады. 17 желтоқсаннан бастап жергілікті ауқымдағы төтенше жағдай ресми түрде жарияланды.

Төтенше жағдайлар резервінен бөлінген қаражат есебінен зақымданған нысандарда жөндеу және қалпына келтіру жұмыстары жүргізіледі», – делінген қалалық әкімдіктің баспасөз қызметі таратқан хабарламада.

11 желтоқсаннан бері қаладағы коммуналдық қызметтер күшейтілген режимде жұмыс істеп келеді. 

Әкімдіктегілер қазіргі уақытта Қонаев қаласындағы жағдай тұрақты екенін мәлімдеді: электр энергиясы, ауыз су және жылумен қамту жүйелері штаттық режимде жұмыс істеп тұр.