Көлік министрлігі ішкі әуе рейстерін қосылған құн салығынан босатуды ұсынды
Қазақстанда ішкі әуе рейстерін қосылған құн салығынан босату ұсынылып отыр.
Астана, NEGE. Бұл жөнінде Үкімет отырысында көлік министрі Нұрлан Сауранбаев мәлімдеді.
Биылдан бастап ҚҚС мөлшерлемесі 12%-дан 16%-ға дейін көтерілді. Бұл тауарлар мен қызметтердің қымбаттауына әкеп соқты.
«Ішкі тасымалдарды одан әрі дамыту үшін заңнамаға өзгерістер енгізу ұсынылады. Атап айтқанда, жергілікті атқарушы органдарға облысаралық рейстерді өз есебінен субсидиялауға рұқсат беру. Сонымен қатар тұрақты рейстерге қосылған құн салығын алып тастау», – дейді министр.
Сондай-ақ бүгін, 19 мамырда Үкіметте өткен жиында көлік министрлігінің басшысы ішкі рейстерге биометриялық сәйкестендіру жүйесі енгізілетінін атап өтті. Оның айтуынша, пилоттық жоба алдымен Астана – Шымкент бағыты бойынша іске асырылады.
Бұған қоса ол паспорттық бақылаудан өздігінен өтуге арналған автоматтандырылған мультибиометриялық терминал – Q-Gate жүйесі бақылаудан өту уақытын 3 минуттан 50 секундқа дейін қысқартқанын мәлімдеді. Қазіргі уақытта Астана және Алматы әуежайларында 16 Q-Gate терминалы жұмыс істейді. Биыл Шымкент, Атырау, Ақтөбе және Ақтау қалаларының әуежайларында тағы 16 Q-Gate орнату жоспарланған.