Көлікте қыз зорлаған азаматқа қылмыстық іс қозғалды

Алматы, NEGE. Бұл жайында «Немолчи» қозғалысының әлеуметтік желідегі жазбасынан мәлім болды. Онда Ақтауда тұратын бойжеткенді танысы мәшинеде зорлағаны жайлы айтылған.

«Ол қыз пәк болатын. Кеше полицияға арыз берілді, бірақ әлі күнге дейін тергеуші белгілі емес, жәбірленушінің киімін де алған жоқ. Полицейлер күдіктіні ұстамады, оқиға орны да қаралған жоқ, көлікті айып тұрағына қоймады, тіпті сараптама да тағайындаған жоқ» деп жазылған мәліметте.

Осыған қатысты Маңғыстау облыстық полиция департаменті түсініктеме берді.

«2021 жылы 26 қазанда Ақтау қаласы полиция басқармасына қыз бала танысының оның еркінен тыс жыныстық қатынасқа түскені туралы жазбаша арыз жазған. Аталған дерек бойынша ҚР ҚК 120-бабы 1-бөлігі бойынша қылмыстық іс қозғалды. Сот-медициналық сараптама тағайындалды. Тергеу амалдары жүріп жатыр» деп мәлім етті полиция департаментінің баспасөз қызметі.