«Көктөбе» телемұнарасы жер сілкінісіне қаншалықты дайын?
Премьер-министр Олжас Бектеновтің айтуынша, «Көктөбе» телемұнарасы қолданыстағы сейсмикалық тұрақтылық нормаларына толық сәйкес келеді.
Астана, NEGE. «Көктөбе» телемұнарасы «Қазтелерадио» акционерлік қоғамының балансында.
«Тәуелсіз техникалық зерттеп-қараудың, cоның ішінде 2024 жылы жүргізілгеннің нәтижелері бойынша телемұнараның қолданыстағы сейсмикалық төзімділік нормативтеріне сәйкес келетіндігі расталды. Конструкцияның қауіпсіздігіне, конструкциялық орнықтылығына және нысанды әрі қарай пайдалануға қатысты қауіп-қатерлер анықталған жоқ. Тіреу конструкциялары техникалық жағынан сенімді әрі пайдалануға жарамды деп танылды», – деді Бектенов сенаторлардың сауалына берген жауабында.
Премьер-министр «Көктөбе» телемұнарасына баратын жол туралы да ақпарат берді: 2024 жылы Алматы қаласының әкімдігі ұзындығы 0,388 км болатын учаскеге орташа жөндеу жүргізді. Жол төсемінің жағдайы қанағаттанарлық деп бағаланған, бұл учаске 2027 жылдың соңына дейін мердігер ұйым «Алматы Дормеханизация» ЖШС-нің кепілдігінде тұр. Телемұнараға апаратын қосымша (кірме) жол салу мәселесі Алматы қаласының әкімдігі тарапынан 2026 жылға арналған құрылыс жұмыстарын жоспарлау шеңберінде қарастырылатын болады.
