КҚК терминалында Қазақстан мұнайын тиегелі тұрған екі танкерге шабуыл жасалды
Каспий құбыр консорциумының Қара теңіздегі жүк тиеу терминалы маңында екі мұнай танкеріне шабуыл жасалды, деп хабарлайды Bloomberg.
Астана, NEGE. Агенттік дереккөзінің хабарлауынша, Delta Harmony және Matilda атты екі танкерге КҚК-ның теңіздегі айлағында Қазақстаннан жеткізілген мұнай тиелуі тиіс болған.
Мәлімет бойынша, грекиялық Delta Tankers компаниясының басқаруындағы Delta Harmony такеріне «Теңізшевройл» жобасының мұнайы, ал Thenamaris компаниясының басқаруындағы Matilda танкеріне Қарашығанақ кен орнынан өндірілген мұнай тиелуі керек еді.
Thenamaris компаниясының өкілі Matilda танкеріне КҚК-дан шамамен екі дрон шабуыл жасағанын растады.
Қазақстан Республикасы Энергетика министрлігі бұл жайтқа түсініктеме беріп, қазіргі уақытта КҚК терминалында мұнай жөнелту ШАҚ-1 (ВПУ) айлақ құрылғысы арқылы іске асырылып жатқанын хабарлады.
«Технологиялық процесс акваториядағы қазіргі ауа райына байланысты енгізілген түзетулерді ескере отырып, штаттық режимде жүргізілуде.
Ведомствоның негізгі басымдығы – экспорттық жеткізілімдердің тұрақтылығын қамтамасыз ету, сондай-ақ сақтау қуаттарының шамадан тыс толып кетуіне жол бермеу», – деп мәлімдеді энергетика министрінің кеңісшісі, министрліктің ресми өкілі Әсел Серікпаева.
Сондай-ақ ресми өкіл Энергетика министрлігі жағдайды бақылап отырғанын және халықаралық серіктестермен, консорциум операторымен тікелей байланыста екенін атап өтті.
