КҚК Қазақстан мұнайын тасымалдаудың басым бағыты болып қала береді
Каспий құбыр консорциумы Қазақстан мұнайын тасымалдаудың басты арнасы болып қала береді. Бұл туралы энергетика министрі Ерлан Ақкенженов халықаралық CERAWeek конференциясында мәлімдеді.
Астана, NEGE. Талқылау барысында министр энергетика саласының алдында тұрған негізгі міндеттерге тоқталды. Оның айтуынша, басты мәселелердің бірі – энергетикалық қауіпсіздікті қамтамасыз ету.
Бұл ретте Каспий құбыр консорциумы (КҚК) жүйесінің тұрақты жұмысын сақтау ерекше маңызға ие. Себебі дәл осы құбыр арқылы Қазақстан мұнайының негізгі бөлігі экспортталады.
Министр КҚК бағытының үздіксіз жұмыс істеуі ұлттық экономика үшін стратегиялық маңызы бар екенін атап өтті.
Сонымен қатар Қазақстан мұнай экспортын әртараптандыру саясатын кезең-кезеңімен жүзеге асырып келеді. Атап айтқанда, Қытай Халық Республикасы бағытына шығатын маршруттарды дамыту қарастырылуда. Дегенмен экономикалық тиімділігі жоғары болғандықтан, КҚК әзірге Қазақстан мұнайын тасымалдаудың негізгі әрі басым арнасы болып қала береді.
