Қызылордада жедел жәрдем қызметкерлері жол апатынан көз жұмды
Қызылорда қаласында жол-көлік оқиғасынан жедел жәрдем қызметкерлері көз жұмды, - деп хабарлайды Қазақпарат.
Алматы, NEGE. «Жол-көлік оқиғасынан екі адам медициналық мекемеде көз жұмды. Тексеру барысында «Toyota Land Crusier» автокөлігінің жүргізушісі орта дәрежедегі масаң күйде болғаны анықталды. Бұл азамат 2016 жылғы қараша айында Қызылорда қаласының мамандандырылған әкімшілік сотының шешімімен 5 жылға көлік құралын басқару құқығынан айырылған. Жол-көлік оқиғасы бойынша ҚР Қылмыстық кодексінің 346-бабының 6-бөлігімен сотқа дейінгі тергеп-тексеру амалдары жүргізілуде», - деп мәлім етті Қызылорда қалалық полиция басқармасынан.
Ведомство мәліметінше, «Toyota Land Cruiser» автокөлігінің жүргізушісі Қызылорда қалалық полиция басқармасының уақытша ұстау абақтысына қамалды. Тиісті сараптамалар тағайындалды. Оқиғаның мән-жайы анықталып жатыр. Облыс орталығындағы №5 емхана ұжымы фельдшер Жадыра Омарова және жедел жәрдем көлігінің жүргізушісі Бақытжан Маенов қызмет бабында қаза тапқанын хабарлады.