Қызылордада «Warner Bros» қаржы пирамидасы бөлімшесінің бастығы сотталды
Қаржы мониторингі агенттігі Қызылорда қаласында «Warner Bros» қаржы пирамидасының құрылымдық бөлімшесін басқарған азаматтың бес жылға бас бостандығынан айырылғанын хабарлады.
Астана, NEGE. Тергеп-тексеру іс-шараларын агенттіктің Қызылорда облысы бойынша департаменті жүргізген.
Ұйымдастырушы тұрғындарды қаржы пирамидасына «Warner Bros» платформасы арқылы қысқа бейнероликтер мен фильмдерді көріп, табыс табуға болады деген желеумен тартқан. Схеманы насихаттау үшін WhatsApp топтары, әлеуметтік желілердегі жарнамалар және үгіт-насихат кездесулері пайдаланылған.
«Қатысушыларға рефералдық сілтеме арқылы тіркеліп, құны 10 мың теңгеден 11 млн теңгеге дейінгі VIP-пакеттердің бірін сатып алу ұсынылған. Бұл ретте күніне 735 мың теңгеге дейін табыс табуға болатыны уәде етілген. Әрбір жаңа қатысушы үшін бонус төленіп отырған, бұл азаматтарды жүйеге тұрақты түрде тартуға ынталандырған», – делінген ҚМА хабарламасында.
Салымшылардың қаражатын жинақтау және аудару үшін криптоәмияндар қолданылған.
Сот айыпталушыны кінәлі деп танып, 5 жылға бас бостандығынан айыру жазасын тағайындады және 3 млн USDT көлеміндегі криптоактивтерін бұғаттады.
Сондай-ақ 24 жәбірленушінің азаматтық талап-арыздары қанағаттандырылды.
Үкім заңды күшіне енді.