Қызылордада 12 адамның қаны құйылған әйел ВИЧ жұқтырды
Босанғаннан кейін ауыр жағдайда түскен әйелге донорлардың қаны құйылғаны белгілі болды.
Алматы, NEGE. Әйелге қан құйылған бір айдан кейін оған АИТВ диагнозы қойылған. Оқиға тіркеліп, денсаулық сақтау министрлігіне жолданғаны айтылды.
«2024 жылдың 23 қыркүйегінде ол ұл бала босанған. Сол күні сағат 04:25-06:00 аралығында жатырдан қан кетуіне байланысты лапаротомия әдісімен бірінші ота жасалған. Тағы сол күні 17:00-19:05 аралығында қайтадан жатырдан қан кетуіне байланысты екінші ота жасалған. 23 қыркүйек пен 16 қазан аралығында облыстық перинаталдық орталықта ем алған", – делінген хабарламада.
Денсаулық сақтау министрі Ақмарал Әлназарова аталмыш деректі растап, тексеру жүргізіліп жатқанын мәлімдеді. Тергеу нәтижелері бойынша тиісті шара қабылданады.
Ал полиция оқиғаға қатысты қылмыстық іс қозғады.