Қызы балабақшада күйіп қалған ана соттасып жатыр
Оқыс жағдай наурыз айында Ақтаудағы балабақшалардың бірінде болған. Жеті жасар Каринаның оңбай күйген сәті бейнебақылау камерасына жазылған. Кадрлерден ас бөлмеге жүгіріп кірген қыздың үстіне күтуші әйел ыстық сорпаны төгіп алғанын көруге болады.Бұл туралы «КТК» хабарлады.
Алматы, NEGE. Анасы баласының үстіне ыстық сорпа төгіп алған балабақша қызметкері тиісті жазасын алуы керек деп есептейді. Салдарынан бүлдіршіннің денесін 30 пайыз күйік шалған. Алғашында Каринаның жүріп-тұруы да мұң болыпты. Анасы жұмысына салғырт қараған балабақша қызметкерлерін кінәлап отыр. «Мектепке дейінгі мекемеде балалардың қауіпсіздігі мүлдем сақталмаған», – дейді ол.
«Біз барғанда баланың үстібасы сорпа болды. Ешкім жедел жәрдем шақырмаған. Киімдерін бірден шешкені ақылға қонымсыз. Алғашқы медициналық көмек мүлдем көрсетілмеген. Қызым жанұшыра айғалап жатса да, тәрбиеші алаңсыз жүр. Өйткені ол саңырау екен. Жасы 72-де. Мұндай адамды қалай жұмысқа алуға болады?», – деп шағынады қыздың анасы.
Баласын уайымдаған Сәния тоғыз айдан бері талай аурухана табалдырығын тоздырыпты. Алайда Ақтаудан білікті маман тапағанын айтады. Кейін қызын Нұр-Сұлтан қаласына апарып, бірнеше ота жасатқан. Қазір қыздың жағдайы қалыпты. Бірақ денесінде күйіктің іздері әлі бар. «Қызыма 40 екпе салды. Қиналғанын көріп, жанымды қоярға жер таппадым. Балабақша директоры бір ай өткен соң бізді ұмытты. Қызым әлі өз өзіне келген жоқ. Әбден шошып қалған. Бұл жағдай басқаларға да сабақ болуы тиіс», – деді қыздың анасы.
Ал қалалық білім басқармасындағылар балабақшаның бірқатар қызметкерін жұмыстан шығарғанын айтады. Ал баланың ем-домына мектепке дейінгі мекеменің ұжымы 600 мың теңге жинап беріпті. Ақтау қалалық білім басқармасының бөлім басшысы Ақмарал Байшаханова: «Осы жағдайдан кейін біз балабақшада қызметтік тексеріс жүргіздік. Тәрбиеші мен директордан түсініктеме алдық. Аталған балабақшаның тәрбиешісі, оның көмекшісі мен медбике жұмыстан босатылды», –деді.
Алайда оқиғаға қатысты алғашқы сот процесі де басталды. Каринаның анасы кінәлілер тиісті жазасын алмайынша, соңына дейін күресемін деп отыр. Қыздың еміне кеткен қаражатты толық көлемде өндіріп алмақшы.
