Қыз зорлады деп айыпталған боксшы Жанқош Тұраровқа қатысты қылмыстық іс тоқтатылды
Кәсіпқой боксшы Жанқош Тұраровқа қатысты «Зорлау» бабы бойынша қозғалған қылмыстық іс тоқтатылған, деп хабарлады Алматы полиция департаментінің баспасөз қызметі.
Алматы, NEGE. Әуезов аудандық полиция басқармасы боксшыға қатысты Қазақстан Республикасы Қылмыстық кодексінің 120-бабы 1-тармағы бойынша қылмыстық істі тергеді.
«Іс жүргізу аясында сот-медициналық және сот-биологиялық сараптама жүргізіліп, қорытындысы бойынша зорлау фактісі расталмады. 2024 жылғы 20 қазанда Қазақстан Республикасы қылмыстық іс жүргізу кодексінің 35-бабы, 2-тармағының 1-бөлігі негізінде сотқа дейінгі тергеп-тексеруді тоқтату туралы түпкілікті шешім қабылданды», - деп хабарлады полиция.
Бұл шешіммен Әуезов ауданының прокуратурасы да келіскен.
