«Қыз Жібектің» камзолы Баян Алагөзовада қайдан жүр?
Жақында Баян Алагөзова қызғылт камзол киіп түскен видеосын жариялап, бұл камзол «Қыз Жібек» фильмінде басты рөлді ойнаған актриса Меруерт Өтекешованікі екенін айтты. Сондай-ақ ол қымбатқа бағаланатын бұл музей экспонатын үйінде сақтайтынын жеткізді.
Астана, NEGE. Мәдениет және ақпарат министрлігі продюсердің осы видеосына қатысты пікір білдіріп, камзолдың жеке қолға қалай өткені анықталып жатқанын мәлімдеді.
Министрлік мәліметінше, «Қазақфильм» киностудиясының музей қорында «Қыз Жібек» фильмінде пайдаланылған бір камзолдың түпнұсқасы сақтаулы.
«Бұл жәдігер ұлттық кино өнерінің маңызды мәдени мұрасы ретінде қорғалған. Ал продюсер жариялаған жазбадағы екінші камзолдың жеке қолға қалай өткендігі анықталуда», – делінген хабарламада.
Бұған қоса «Қазақфильм» киностудиясы ұлттық мәдени мұраны келешек ұрпаққа жеткізу үшін ұлттық фильмдерде пайдаланылған құнды реквизиттерді, костюмдер мен басқа да тарихи маңызы бар заттарды жүйелі түрде жинақтап, қалпына келтіру және сақтау жұмыстарын жүргізіп келе жатқаны айтылған.