«Қытайға өткізген»: ШҚО-да кәсіпкер пайдалы қазбаны заңсыз өндірген
Қаржылық мониторинг агенттігі Шығыс Қазақстан облысы Шемонаиха ауданында заңсыз кәсіпкерлік қызмет фактісі бойынша тергеп-тексеру аяқталғанын хабарлады.
Астана, NEGE. Агенттік мәліметінше, «Глинковское» кен орнында ЖШС басшысы пайдалы қатты қазбаларды заңсыз өндіру мен өткізуді ұйымдастырған.
Компанияның лицензиясы тек геологиялық барлау жұмыстарын жүргізуге ғана құқық берген. Алайда пайдалы қазбаларды өнеркәсіптік көлемде өндіруге рұқсаты болмаған.
Соған қарамастан, темір құрамды тау жынысын өндіру, оны қайта өңдеу, жинақтау және ішкі нарықта, сондай-ақ Қытай Халық Республикасына өткізу жұмыстары жүргізілген. Ауыр арнайы техниканы қолдану қоршаған ортаға теріс әсер етіп, жер бедерінің табиғи қалпының бұзылуына және жердің тозуына әкеп соққан.
«Заңсыз өндірілген өнімнің жалпы көлемі 70 мың тоннадан, ал алынған қылмыстық табыс сомасы 1 млрд теңгеден асқан. Бұл қаражатқа күдіктілер жылжымалы және жылжымайтын мүлік – бизнес-орталық, Алматы қаласындағы пәтер, LAND ROVER RANGE ROVER маркалы автокөлік, 2 автотұрақ орны және 2 жер телім сатып алған», – делінген ҚМА хабарламасында.
Сот санкциясымен бұл мүліктерге тыйым салынды.
