Қытайдағы жарыста Назым Қызайбай мен Виктория Графеева топ жарды
Қытайдың Гуйян қаласында бокстан әлем кубогының екінші кезеңі мәресіне жақындады. Шешуші жарыс күнінде Қазақстан құрамасы алғашқы алтын медальдарын жеңіп алды.
Астана, NEGE. 54 келіге дейінгі салмақта сынға түскен Назым Қызайбай финалда Италия өкілі Сирин Чараабиден басым түсті. Ал 60 келіге дейінгі салмақта өнер көрсеткен Виктория Графеева шешуші жекпе-жекте Олимпиада чемпионы Юй-Тин Линьді жеңді. Ол Тайбэй атынан өнер көрсетеді.
Қазіргі уақытта Қазақстан құрамасының қоржынында үш алтын және үш қола медаль бар. Үшінші алтынды 70 келіге дейінгі салмақта сынға түскен Абылайхан Жүсіпов жеңіп алды. Ол финалда Үндістан өкілі Дипакты төрешілердің бірауыздан шығарған шешімімен жеңді.
Бұған дейін Аида Әбікеева 65 келіге дейінгі салмақта, Валерия Аксенова 80 келіге дейінгі салмақта, ал Дина Исламбекова 80 келіден жоғары салмақта қола жүлдегер атанған еді.