Қытайда тау тасқынынан 10 адам қаза тауып, 33 адам із-түзсіз жоғалды
Қытайдың солтүстік-батысындағы Ганьсу провинциясында тау тасқыны салдарынан 10 адам қаза тауып, 33 адам із-түзсіз жоғалып кетті, деп хабарлады Синьхуа.
Алматы, NEGE. Ганьсу провинциясының Юйчжун уезінде жауын-шашын салдарынан болған тау тасқыны ауыр зардаптарға әкелді. Жергілікті биліктің мәліметінше, жұма күні сағат 15:30–дағы жағдай бойынша 10 адам қаза тауып, 33 адам іздестіріліп жатыр.
Бейсенбі кешке нөсер жауын Ланьчжоу қаласына қарасты Юйчжун және өзге де аудандарға жауған. Жұма күні түске дейін жауын-шашын мөлшері 220,2 мм-ге дейін жеткен. Юйчжун уезіндегі бірнеше ауыл қатты зардап шеккен.
Жұма күні сағат 14:00 шамасында Чэнгуань кентіндегі Синлун бастауыш мектебінің жанында сел суы тамырынан жұлынып кеткен ағаштармен араласып, жолдарды бөгеп тастағаны хабарланды.
Кейбір жерлерде балшықтың тереңдігі 30 см-ден асқан. Жол жиегінде көптеген көлік бүлінген, ал кейбір үйлердің бірінші қабатындағы жиһаз тасқын сумен толықтай ағып кеткен.
Аймаққа 2 700-ден астам құтқарушы, 980 техника және 8 530 дана алғашқы көмек заттары жіберілген. Қазір оқиға орнында құтқару, инфрақұрылымды қалпына келтіру, эвакуация және тұрғындарды орналастыру жұмыстары жүріп жатыр.
ҚХР төрағасы Си Цзиньпин Ганьсу провинциясында болған тау тасқынына байланысты іздестіру-құтқару жұмыстарын барынша жеделдетуді, сондай-ақ су тасқындарының алдын алып, табиғи апаттардың салдарын жою бойынша барлық қажетті шараларды қабылдауды тапсырды.
Си Цзиньпин соңғы уақытта жиілеп кеткен қолайсыз ауа райына байланысты барлық өңірлер мен тиісті органдарды тәуекелдерді болжау мен ерте ескерту жүйесін күшейтуге, жасырын қауіптерді анықтап, уақтылы жоюға, кезекшілік пен төтенше жағдайларға жедел ден қою тәртібін күшейтуге, су тасқынына қарсы іс-шараларды нақты әрі үйлесімді жүргізуге шақырды. Ол тасқын су маусымында халықтың қауіпсіздігін қамтамасыз ету – басты міндеттердің бірі екенін атап өтті.
Бұған дейін Қытайдың оңтүстігіндегі Гуандун провинциясында орналасқан Гуанчжоу қаласының Байюнь ауданында сәрсенбі күні нөсер жаңбыр салдарынан көшкін жүріп, 14 адам үйінді астында қалғаны хабарланды.
