Қытай мен Оңтүстік Кореяда індет қайта бас көтерді
Қытай билігі жексенбі күні ел астанасы Бейжіңде бір күннің ішінде коронавирус жұқтырғандар санының күрт өсіп кеткенін хабарлады. Жалпы ел аумағында жаңа 57 науқас тіркелсе, оның 36-сы Бейжің тұрғындары. Бұл Бейжіңдегі азық-түлік сататын ең ірі көтерме базарды жауып, іргелес аудандарға кіріп-шығуға шектеу қойылған соңғы екі айдағы бір күнде тіркелген ең көп науқас саны екен.
Алматы, NEGE. Бейжіңнің оңтүстік-шығысында орналасқан «Синьфади» базары мен оған жақын орналасқан тұрғын үй кешендері сенбі күні жабылған. Бұған тест тапсырған 50-ден астам адамнан ауру белгісінің табылғаны себеп болған.
Қала билігі базарға жақын 11 тұрғын үй кешенін жауып тастаған. Бұл Қытайдың коммунистік партиясының наурыз айында ел індетті түбегейлі жеңгені туралы мәлімдемесінен кейінгі қолға алынған алғашқы қатаң шара.
Ал Оңтүстік Корея билігі тағы 34 адамнан коронавирус табылғанын, олардың дені ел астанасы Сеулден екенін мәлімдеді. Ресми дерек бойынша бұл елде індет жұқтырған 12 085 науқас тіркелген, оның 10 718-і жазылған, 1 090 адам ем қабылдауда, 277-сі көз жұмған. Жаңа науқастар ауруды кешқұрым мейрамханаға барғанда, базарда, үлкен сауда қоймасында, шіркеуде жұқтырған.
