Қырғызстанда Ми-8 тікұшағы апатты жағдайда қонды: бірнеше адам жарақат алды
Қырғызстан Қорғаныс министрлігі таудағы альпинистердің зардап шеккенін, сондай-ақ эвакуацияға шыққан Ми-8 тікұшағының қатты қонғанын хабарлады, деп жазады Kabar.
Алматы, NEGE. Ведомствоның мәліметінше, бүгін Жеңіс шыңы маңында Қорғаныс министрлігіне тиесілі Ми-8 тікұшағы (борт нөмірі 205) апатты жағдайда қонуға мәжбүр болған. Экипаж альпинистерді эвакуациялау үшін ұшып шыққан еді.
– Биік таудағы қиын метеожағдайда қону кезінде тікұшақ қатты қонды. Бортта экипаж мүшелері мен құтқарушылар болған. Олардың барлығы аман, алайда бірнеше адам әртүрлі деңгейде жарақат алды. Жарақаттар олардың өміріне қауіп төндірмейді, – делінген министрлік хабарламасында.
Қазіргі таңда оқиға орнына арнайы мамандар жіберіліп, зардап шеккендерді эвакуациялау жұмыстары жалғасуда. Қорғаныс министрлігі жеке құрамның қауіпсіздігін қамтамасыз ету және құтқару операциясын аяқтау үшін барлық қажетті шараларды қабылдап жатыр.