Қырғыздар қазақ көкпаршыларын қарымта ойынға шақырды
Қырғызстанның көкбөрі федерациясы Қазақстан құрамасына қарымта ойын өткізуді ұсынды.
Алматы, NEGE. Бұл туралы Қырғызстан көк бөрі федерация басшысы Рамис Джунусалиев хабарлады.
– Біз даулы мәселелерді біржола жою үшін қазақстандық тарапқа реванш матчын өткізуді ұсынамыз. Көрші елдің спортшыларына Дүниежүзілік көшпенділер ойындарында болған құраммен ойынға келуді ұсынамыз, – делінген хабарламада.
Бұл ұсыныс Қырғызстан мен Қазақстан арасындағы спорттық байланыстарды нығайтуға және әділ ойынды ұйымдастыруға бағытталған.
Естеріңізге сала кетейік, Көкпардан финалдық ойында Қазақстан құрамасы Қырғызстан командасын 5:4 есебімен жеңіп, алтын жүлдеге ие болған. Ойын кезінде қазақ пен қырғыз көкпаршылары арасында жанжал туындады.
Бірінші кезеңнің аяқталуына 6 минуттай уақыт қалғанда серкеге талас кезінде көкпаршылар қақтығысып қалған. Нақтырақ айтқанда, еліміздің көкпаршысы қарсылас қырғыз командасының көкпаршысын қамшымен ұрған. Оларды ажыратуға тәртіп сақшылары араласқан болатын.
